ربما الحياة أجمل

بُـســتـان الــحــيـاه
ممكن الأحلام تموت
وسط بستان الحياه
والطيور الجارحة تكتر
والأمل يخسر خطاه
بس لو عندك إرادة
خللي نبضة قلب واحدة..هى طوقك للنجاه
وازرع البستان وخَضَّر
ترجع الأحلام تِزَهَّر
وارتعاشك يبقى تاه
والحياه..
الحياه محتاجه لحظه
نمحى فيها الــ / يأس والحزن اللــِ بيعشش معاه
وابتسم.../
ابتسم رغم احتمالك
واسمع النصح اللي جالك..:
ان مهما هتبكى عمرك
مش هتبكى الناس بدالك
يبقى أحسنلك..تِغَنِّى
أيوه غَنِّى
واهزم الخوف بالتمنى
تلقى فرح الكون معاك
أحسن أمّا تطب ساكت
مين هيسمع كَتْم صوتك..!؟
أصل هى الدنيا لحظة
إما تتبسم ياصاحبى..يومها تكسب
أو هتخسر..لما تغضب..راحة العمر اللي باقي
واما تتعلم وتفهم..
مش هتعرف تانى تصرخ
مش هتعرف تانى تحلم
وان حلمت..!
مش هتعرف تروى حلمك
وسط بستان الحياه